Føring av personalkostnader og indirekte kostnader i instituttsektoren

Det er følgjande fire grupper av institusjonar på Forskingsrådets liste over godkjende forskingsorganisasjonar som vi kvart år ber om å melde inn timesatsane sine:

• organisasjonar omfatta av regjeringas Retningslinjer for statlig grunnbevilgning av forskningsinstitutter og forskningskonsern
• andre organisasjonar omfatta av regjeringas Strategi for helhetlig instituttpolitikk. 
• andre einingar i offentleg sektor som er pålagd å utføre forsking
• forskingsorganisasjonar godkjend av Forskingsrådet etter søknad

Legg merke til at organisasjonar omfatta av retningslinjene for statleg grunnløyving skal melde inn timesatsar. Resten av organisasjonane i lista over kan velje å melde inn timesatsar under føresetnad av at dei oppfyller krava i retningslinjene.

Dei innmelde timesatsane skal nyttast i FoU-prosjekt med tilskot frå Forskingsrådet, uavhengig om instituttet leier prosjektet eller inngår som samarbeidspartnar i eit faktisk samarbeid med prosjektansvarleg søkjar. Timesatsane skal også brukast i prosjekt finansierte gjennom grunnløyving frå Forskingsrådet eller andre offentlege etatar.

Forskingsorganisasjonar som vel å ikkje melde inn timesatsar, eller ikkje oppfyller krava gitt i retningslinjene, skal i prosjekt med finansiering frå Forskingsrådet føre sine personalkostnader og indirekte kostnader i samsvar med retningslinjene gitt på nettsida Føring av personalkostnader og indirekte kostnader for næringsliv, offentleg sektor og andre søkjarar.

Forskingsinstitutt og forskingsorganisasjonar i gruppa "Andre godkjende forskingsorganisasjonar" som ikkje ønskjer å melde inn timesatsar eller som ikkje oppfyller krava, kan bruke rundsumsats for stipendiatstillinger for alle personal og indirekte kostnader i søknader som blir sende inn innan 31. desember 2025.

For forskingsinstitutt og andre forskingsorganisasjoner som skal søkje om støtte til stipendiatstillingar i FoU-prosjekt innan 31. desember 2025, gjeld satsane på informasjonssida: Satser for støtte til stipendiatstillinger.

Slik melder du inn timesatsar til Forskingsrådet

Dei forskingsorganisasjonane som årleg blir inviterte til å melde inn timesatsar blir kontakta av Forskingsrådet i rimeleg tid før tidsfristen for innmelding. Dei innmelde timesatsane skal vere rekna ut i samsvar med Forskingsrådets retningslinjer (sjå nedanfor):

• Retningslinjer for berekning og innmelding av timesatsar 2026 (pdf)
• Rettleiande døme på berekning av timesatsar (Excel-fil)

Personal- og indirekte kostnader i prosjektrekneskapen

Forskingsinstitutt som har fått godkjent innmeldte timesatsar, skal føre personalkostnader og indirekte kostnader i same kostnadslinje i prosjektrekneskapen basert på godkjende satsar.  

Organisasjonar som mottek tilskot frå Forskingsrådet må ha eit system for registrering av arbeidstida til medarbeidarane i prosjektet. Ei slik registrering fungerer som eit grunnlag for prosjektrekneskapen, for prosjektrekneskaps-rapporteringa og for førespurnaden frå Forskingsrådet om utbetaling.